Fræðslunetið – símenntun á Suðurlandi afhenti í dag sjö starfsmönnum Reykjagarðs Fagbréf atvinnulífsins fyrir starfsfólk í matvælaiðnaði.
Fagbréfið er formleg viðurkenning á þeirri þekkingu, færni og hæfni sem starfsfólk hefur byggt upp í gegnum störf sín. Í ferlinu var færni þátttakenda metin með raunfærnimati út frá hæfniviðmiðum starfsins.
Við óskum starfsmönnunum innilega til hamingju með þennan mikilvæga áfanga. Viðurkenningin endurspeglar bæði reynslu þeirra og þá fagmennsku sem þau sýna í starfi á hverjum degi.
Það var sérstaklega ánægjulegt að sjá stjórnendur Reykjagarðs styðja starfsfólk sitt og hvetja það til að taka þetta mikilvæga skref í starfsþróun. Slíkur stuðningur skiptir miklu máli þegar kemur að því að gera færni sýnilega og skapa tækifæri til áframhaldandi vaxtar í starfi.
Fagbréf atvinnulífsins hefur það markmið að gera reynslu og kunnáttu starfsfólks sýnilega, styrkja stöðu þess á vinnumarkaði og hvetja til frekara náms og starfsþróunar. Fræðslunetið aðstoðar fyrirtæki við framkvæmd raunfærnimats og útgáfu Fagbréfa í samstarfi við atvinnulífið.
